حدث خطأ في هذه الأداة

الخميس، 28 مارس، 2013

رسالة الى نفسى



(رسالة الى نفسى ، لعلها تكون تذكرة مهمة فى الوقت المناسب)

مفيش حاجة فى الدنيا تستاهل انك تنام بالليل و حد زعلان منك ، او تنام زعلان أصلاً ... ارمى همومك على اللى خالقك ، و خلى عندك ثقة ان ربنا بيعملك الصالح دايماً ان شاء الله .
لما تكون فى مزاج مش كويس ، حاول تخرج منه بأى طريقة ... صدقنى حياتك قصيرة حرام نضيعها فى زعل و نرفزة.
لما تحتاج تعيط ... عيط بجد ، و لما تحتاج تضحك .. اضحك من قلبك بجد .
ابتسم فى وجه الناس ، و قابل الإساءة بالحسنة ، و خد انت الحسنات ... بس متنساش ادعى للى أساء ليك ان ربنا يسامحه ، عشان ميتحسبش عليه ذنب.
ادعى بالخير لكل الناس .. احبابك ، أصحابك ، عيلتك ، حتى اللى متعرفهومش ... ادعى دايماً بالخير لكل الناس.
صفى قلبك من جوة أوى ... شيل منه اى بذرة حقد ، حسد ، كره تجاه أى حد.
حط الظروف فى اعتبارك ... كل واحد بيبقى محاط بظروف معينة هى اللى بينتج عنها أى فعل.
فكر الأول انت عملت ايه غلط  فى غيرك  قبل ما تفكر غيرك عمل ايه غلط فيك .
ابدأ بالصلح دائماً مهما كان اللى قدامك غلطان ... فَوِت على أى حد انه يعكر مزاجك و يزعلك.
ساعد حد محتاجلك ... حتى لو هتيجى على نفسك شوية على قد ما تقدر ... صدقنى فى الاّخر هتتبسط أوى لما تحس انك أدخلت السرور على قلب انسان .
لو ده جنان اتجنن .. و سامح كل الناس على أى حاجة وحشه عملوها فيك ، و كمان اتأسف لهم على أى حاجة وحشة عملتها فيهم حتى و لو من وجهتهم نظرهم هما بس .
صدقنى حياتنا مش مستاهلة كل التفكير ده فى فلان عمل و فلان قال...
الحياة أبسط من كده بكتير .. صدقنى دايماً افتكر ان فى يوم هتحتاج لدعوة كل انسان عرفته فى حياتك ...
ساعتها الدعوات الصادقة اللى طالعة من القلب هى اللى هتنفعك مش الحزن .